Lüde - küert Plat, dat säg ik faak,

küert Plat, net äs vüör Jaoren,

holt haug de olle Moderspraok,

süs gait dat Plat völuoren.

Lüde - küert Plat, dat küënt gi guët,

in't Huus un bi Bekanten.

Un nich blaus platküern met de Snuut,

auk platküern in Gedanken.

Lüde - küert Plat un schiämt ju nich,

et giw niks to vöbiärgen.

Un mos du haugdüütsk vüör't Gericht,

kaas rüig up Plat di iärgern.

Lüde - küert Plat, et wäd wier Mood

dat Plat draw nich vögaon.

Un wan't nich kaas, dän häöer fien to

un säg, du kaas't vöstaon.

Un küms du maol bi Petrus an,

dän büs du iärste Waol.

"Enliks een, wel platküern kan,"

säg he, "kuëm drin un sät di daal!"

Schultewolters Willi uut Eep